ليه ؟؟؟

اذا توقفت يوما عن العجب ، فإن روحك و عقلك في خطر

أنا قلت بحب مصر
سألوني سؤال غريب
( سألوني. .( ليه؟؟ ..
سؤال لا اتعلمنا نسأله ..و لا نعرف نرد عليه

قلت علشان شمسها و نيلها
قالولي : كان زمان

قلت طب أهلها و خيرها
قالوا : و لا دي كمان

قلت يمكن علشان معرفش غيرها
قالولي : و هو أنت تعرفها

سكت ..سرحت في كلامهم و قعدت أفكر
أفكر في بلدي ..اللي عمري مخرجت منها
بس برضه عمري ما عشت فيها

أنا أصلي زمان قالولي ...
قالولي مصر ...بلدك ..حبها و افخر بيها
و أنا قلت حاضر ..و أنا يعني كنت هقول ايه ؟!!
ما هو أصل (ليه ؟؟) هنا ملهاش مكان
في "مصر" ..بلدي ..بلد الأمان

خايف

اذا توقفت يوما عن العجب ، فإن روحك و عقلك في خطر: November 2005


قالولي جرب
يمكن و جايز
أنا قلت خايف
و بخوفي عاجز
خايف أمد الايدين
وأشد نفسي
من بين أحضان حزني و يأسي
ارجع الاقيني لوحدي
و يقتلني الحنين

شباب أبيض xأبيض

مستغربين .

.بيقولوا ليه الشباب يائس؟!! ليه الشباب محبط؟؟!! ...ايه الغريب في كدة ماهو لو فكر خمس دقايق يبقى لازم ييئس و يحبط و يولول و يعيط .. و اللي مش عامل كده يا اما مطنش يا اما مستهبل يا اما علي رأي شبابنا العزيز اللي بفتخر بانضمامي ليه ( ايه؟ مش لاقي حاجة تانية افتخر بيها) عامل عبيط ...

أصل هي الحكاية بدايتها قديمة أوي ..من ايام الطفولة .. ما هي حاجة من اتنين : يا اما الواحد يكون من اصحاب الطفولة المشردة ( و دول بيتعلموا يفكروا بدري شوية فا بيبقوا يائسين من الاول .. و اصبح اليأس جزء لا يتجزأ من شخصيتهم ) .
يا اما من اللي عاشوا الحلم الوردي من اوله بكل تفاصيله .. كانت دنيتهم حلوة ,جميلة , مرسومة و ملونة .. دنيا حكولهم عليها و قلولهم نظامها واحد ماشية عليه من زمان (زي امتحان الثاناوية العامة كده) ..بمعنى اخر قالولهم متقلقوش سوف تأخذوا مكانكم تحت الشمس ... و اما كبروا شوية و ابتدى بعضهم يفكر و يدور .. ملاقاش شمسمن اساسه , يمكن لقى الكتاب ..كتاب ايه ؟؟ ..كتاب الحواديت اللي عاش عليه و هو صغير ..كتاب كبير أوله ملون و بقيته فاضي .. ورق أبيض .. المفروض هو يرسمه و يلونه...

بس هو فضل السنين اللي فاتت بيسمع حدوتة فاكرها مبتخلصش .. لا اتعلم رسم و لا يعرف يختار ألوان .. يعني الشاب اللي بيفكر (اذن للأسف هو موجود) من ساعت ما لقى الكتاب و هو بيعد الصفحات الملونة الباقية في كتابه و هي بتنقص يوم ورا يوم ..و هو متأكد انه مش هيعرف يكمله .
و ال ايه مش عايزينه يبقى يائس